టోల్ ప్లాజాలో అలాంటి టాయిలెట్ల ఫొటో తీస్తే.. మీకు రూ. 1000 ఆఫర్!

జాతీయ రహదారులపై ప్రయాణించే వారికి భారత జాతీయ రహదారుల సంస్థ (ఎన్‌హెచ్ఏఐ) ఒక ప్రత్యేక అవకాశాన్ని కల్పిస్తోంది. టోల్ ప్లాజాల వద్ద ఉన్న మరుగుదొడ్లు అపరిశుభ్రంగా ఉంటే, వాటిని ఫోటో తీసి ఫిర్యాదు చేసిన వారికి రూ.1,000 నగదు ప్రోత్సాహకాన్ని అందిస్తామని ప్రకటించింది. ఈ మొత్తాన్ని నేరుగా సదరు ప్రయాణికుల ఫాస్టాగ్ ఖాతాలో జమ చేస్తారు. దేశవ్యాప్తంగా జాతీయ రహదారులపై పరిశుభ్రతను పెంపొందించడమే లక్ష్యంగా వినూత్న కార్యక్రమానికి శ్రీకారం చుట్టారు.

ఫిర్యాదు చేయడం ఎలా?

ఈ ప్రోత్సాహకాన్ని పొందాలనుకునే వారు తమ స్మార్ట్‌ఫోన్‌లో 'రాజమార్గ్‌యాత్ర' యాప్‌ను ఉపయోగించాల్సి ఉంటుంది. ఎన్‌హెచ్‌ఏఐ పరిధిలోని టోల్ ప్లాజాల వద్ద అపరిశుభ్రంగా ఉన్న టాయిలెట్‌ను 'జియోట్యాగ్' సదుపాయంతో ఫోటో తీయాలి. అనంతరం తమ పేరు, వాహనం రిజిస్ట్రేషన్ సంఖ్య, మొబైల్ నంబర్ వంటి వివరాలతో పాటు ఆ ఫోటోను యాప్‌లో సమర్పించాలి. ఇలా అందిన ఫిర్యాదులను ఏఐ సాంకేతికత, మాన్యువల్ పద్ధతుల్లో అధికారులు ధ్రువీకరిస్తారు.

నిబంధనలు ఇవే

ఈ పథకానికి సంబంధించి కొన్ని ముఖ్యమైన నిబంధనలు ఉన్నాయి. ఈ అవకాశం కేవలం ఎన్‌హెచ్‌ఏఐ నేరుగా నిర్వహించే టోల్ ప్లాజాల్లోని మరుగుదొడ్లకు మాత్రమే వర్తిస్తుంది. పెట్రోల్ బంకులు లేదా దాబాల వద్ద ఉండే మరుగుదొడ్లకు ఇది వర్తించదు. ఒక టోల్ ప్లాజాకు సంబంధించి ఒక రోజులో అందిన మొట్టమొదటి సరైన ఫిర్యాదుకు మాత్రమే ఈ నగదు బహుమతిని అందజేస్తారు. అలాగే ఈ ప్రచారం అమల్లో ఉన్నంత కాలం ఒక వాహనానికి కేవలం ఒక్కసారి మాత్రమే ఈ రివార్డు లభిస్తుంది.

కేంద్ర ప్రభుత్వం నిర్వహిస్తున్న 'స్పెషల్ క్యాంపెయిన్ 5.0'లో భాగంగా ఈ కార్యక్రమాన్ని అక్టోబర్ 31 వరకు అమలు చేయనున్నారు. జాతీయ రహదారులపై పరిశుభ్రత ప్రమాణాలను మెరుగుపరచడంలో సాధారణ ప్రజలను సైతం భాగస్వాములను చేయడమే ఈ చొరవ యొక్క ప్రధాన ఉద్దేశం.